A do e kundërshtonte Rusia anëtarësimin e Bosnjës në NATO

Ambasadori i Rusisë në Sarajevë, Igor Kalabukhov, ka thënë se vendi i tij “nuk përzihet në të drejtën e Bosnjë-Hercegovinës për të vendosur për fatin e saj”.

Ai i quajti gënjeshtra deklaratat e ambasadorit të SHBA-së në Sarajevë, Eric Nelson, se Rusia nuk do të lejonte anëtarësimin e këtij vendi në NATO. Megjithatë, shtoi se nëse në këtë moment do të vinte deri te një vendim i tillë, Rusia do ta kundërshtonte.

“Bosnjë-Hercegovina, të cilën ne e konsiderojmë një vend mik, ka të drejtë sovrane për të zgjedhur. Por nëse zgjedhja është në favor të anëtarësimit në NATO, edhe pse është e qartë se nuk ka konsensus në vend për këtë çështje, Rusia ka çdo të drejtë të reagojë ndaj këtij zhvillimi hipotetik në përputhje me interesat e saj kombëtare”, theksoi Kalabukhov, përcjell Klix.ba.

Në të vërtetë, Rusia është gati të nisë një luftë, pasi nuk po merr garanci se vendi i saj fqinj, Ukraina, nuk do të anëtarësohet në NATO.

Bosnja, thuajse është e rrethuar nga shtetet që janë anëtare të NATO-s.

Rruga Press