Konflikti me Ukrainën, SHBA kërcënon Rusinë me sanksione të paprecedentë
Shtëpia e Bardhë po koordinon një paketë masash kufizuese me ndikim shumë të lartë për të goditur Moskën në rast se pushton Ukrainën.
SHBA – Nënpresidentja Kamala Harris paralajmëroi të dielën se nëse Moska cenon sovranitetin e Ukrainës, SHBA do të vendosë sanksione kundër Rusisë siç askush nuk i ka parë më parë.
Sipas RT, në një intervistë, Kamala Harris tha se Uashingtoni po koordinon pozicionin e tij me aleatët dhe po sigurohet që Kremlini të jetë i vetëdijshëm për pasojat e mundshme të veprimeve ushtarake. Shtëpia e Bardhë po shqyrton mundësinë e ndalimit të eksporteve të teknologjive konsumatore dhe industriale në Rusi, të tilla si komponentë për telefonat inteligjentë dhe aeroplanë. Kjo, si pjesë e një pakete më të madhe sanksionesh, mund të ndikojë seriozisht konsumatorët, operacionet industriale dhe punësimin.
“Ne jemi duke zhvilluar biseda të drejtpërdrejta me Rusinë. Presidenti, siç e dini, u takua së fundmi virtualisht me Putinin dhe ne e kemi shumë të qartë se Rusia nuk duhet të pushtojë sovranitetin e Ukrainës, se ne duhet të ngrihemi dhe të mbrojmë integritetin e saj territorial.Ne po punojmë me aleatët tanë në këtë drejtim dhe kemi qenë shumë të qartë se jemi të përgatitur të lëshojmë sanksione siç nuk i keni parë më parë” , tha ajo.
Kjo nuk është hera e parë që Uashingtoni njofton një veprim të mundshëm të paprecedentë kundër Rusisë. Në fillim të këtij muaji, Sekretari i Shtetit Antony Blinken paralajmëroi se, në rast të një konflikti ushtarak midis Moskës dhe Kievit, SHBA do të vendosë masa ekonomike me ndikim të lartë ndaj Rusisë, të cilat ajo kishte përmbajtur nga përdorimi në të kaluarën. Këtë gjë e bëri jehonë edhe nënsekretarja e Shtetit për Çështjet Politike, Victoria Nuland.
Kërcënimi i masave ekonomike vjen pas pretendimeve të mediave perëndimore dhe politikanëve se Moska ka filluar të përqendrojë trupat në kufirin e saj me Ukrainën, me synimin për të nisur një ofensivë në të ardhmen e afërt. Zëdhënësi i Kremlinit Dmitry Peskov i ka mohuar akuzat, duke deklaruar se Rusia thjesht po lëviz forcat e saj të armatosura brenda territorit të saj dhe se raportet për një sulm janë të pabaza.
Rruga Press