Messi do të paguhet pjesërisht me kriptovaluta nga Paris Saint-Germain
Paketa financiare e Lionel Messit në klubin francez të futbollit Paris Saint-Germain përfshin edhe pagesa me anë të kriptovalutave.
Messi nënshkroi një marrëveshje dy-vjeçare me PSG këtë javë, me një opsion për një vit të tretë, që do t’i sigurojë atij një pagë vjetore prej 35 milionë eurosh plus bonuse.
Megjithatë, transferimi i yllit argjentinas te klubi nga Parc des Princes u mundësua edhe nga tifozët dhe kriptovalutat.
PSG konfirmoi të enjten se “paketa financiare” e Messit përfshin edhe pagesa me anë të kriptovalutës së tyre të njohur si “$PSG Fan Tokens”.
Klubi francez e lëshoi këtë valutë digjitale për herë të parë te fansat e tij një vit më parë.
‘$PSG Fan Tokens’, e krijuar në janar të vitit 2020 me platformën Socios.com, u krijua për të ndihmuar PSG-në të krijojë një komunitet të ri tifozësh.
PSG tani pretendon se transferimi i argjentinasit 34-vjeçar u mundësua pjesërisht me kripto si një nga “markat më novatore dhe avangarde në sportin global”.
Marc Armstrong, zyrtari kryesor i partneriteteve të PSG-së, tha në një deklaratë se afrimi i Socios.com dhe ‘$PSG Fan Tokens’ i ka mundësuar klubit të angazhohet me një audiencë të re globale dhe të krijojë një rrjedhë të rëndësishme të të ardhurave digjitale.
Në anën tjetër, presidenti i PSG-së, Nasser Al-Khelaifi u tha gazetarëve të mërkurën se bota do të “tronditet” nga të ardhurat financiare të krijuara nga nënshkrimi i klubit me superyllin botëror të futbollit.
Nënshkrimi i Messit pritet të sjellë një fitim të papritur të të ardhurave komerciale, përmes rrugëve të tilla si shitjet e fanellave.
Kur Cristiano Ronaldo nënshkroi për Juventusin në vitin 2018, fanellat e tij u shitën më shumë 60 milionë dollarë në vetëm 24 orë, ndërsa fanella e Messit gjeneroi gati 100 milionë euro në vetëm 24 orë.
Rruga Press