Për shefat që nuk japin dorëheqje

User1
4 0

Shkruan Elvis Hoxha

Lëvizja i mundi të gjithë bashkë. 

Enver Hoxja flet sikur partia e tij ka 1% më pak se fituesi.  

Isa Mustafa thotë se do të bëjnë ndryshime brenda partisë, në vend që të thotë se largimi i tij është ndryshimi më i domosdoshëm dhe më i parë.  

Këto  parti nuk mund ta kenë rigjenerimin e tyre, sepse siç e kapën shtetin, po ashtu kapën edhe partitë dhe elektoratet e tyre. Elektoratet e tyre u çliruan në një masë të madhe. Në janë të nevojshme partitë në një demokraci, këtë e tregon aftësia e tyre për t’u çkapur nga shefat. Por janë këta shefa që sollën:

  1. Listën serbe si parti që kushtëzon Republikën e Kosovës – Shefat nuk e dhanë dorëheqjen,  
  2. Demarkacionin pa viza si cënim të territorit të shtetit – Shefat nuk e dhanë dorëheqjen,  
  3. Zajednicën si dëmtim kushtetues të Republikës së Kosovës – Shefat nuk e dhanë dorëheqjen,  
  4. Gjykatën speciale si dëmtim të luftës çlirimtare që formoi kushtin e pavarësisë – Shefat nuk e dhanë dorëheqjen,  
  5. Përgjimet Pronto si cënim i institucioneve të shtetit – Shefat nuk e dhanë dorëheqjen,  
  6. Korrupsionin me bordet dhe pasuritë publike si cënim të energjisë njerëzore dhe materiale të Kosovës – Shefat nuk e dhanë dorëheqjen,  
  7. Dialogun si fatalitet dhe marrëveshjen si ngutí e kthyen në mendësi të varësisë së Kosovës prej Serbisë – Shefat nuk dhanë përgjigje  
  8. Mashtrimin se shkeljet e tyre vinin prej presionit të ndërkombëtarëve – Shefat nuk e dhanë dorëheqjen,  
  9. Rrënimin e reciprocitetit që është kusht i subjektivitetit ndërkombëtar të Republikës – Shefat nuk e dhanë dorëheqjen.  
  10. Bashkëpunimin më të fortë me forcat më reaksionare të Tiranës zyrtare – Shefat nuk e dhanë dorëheqjen,  
  11. Rehabilitimin e politikës së Beogradit në Kosovë – Shefat nuk e dhanë dorëheqjen,  
  12. Shkëmbimin e territorit si fataliteti se shqiptarët duhet t’i dhurojnë patjetër diçka Serbisë – Shefat nuk e dhanë dorëheqjen,  
  13. Nënshtrimin ndaj figurave ndërkombëtare proserbe si Mogherini dhe Grenelli – Shefat nuk e dhanë dorëheqjen,   
  14. Ndërtimin e një sistemi oligarkik dhe mediatik për ta cënuar publikisht trupën qytetare – Shefat nuk e dhanë dorëheqjen,  
  15. Implikimin e Kushtetueses në akte antikushtetuese vetëm për të mbajtur me çdo kusht pushtetin – Shefat nuk e dhanë dorëheqjen,  
  16. Rrënimin moral dhe ligjor të KQZ-së vetëm për të mbrojtur me çdo kusht mbetjen e tyre në pushtet – Shefat nuk e dhanë dorëheqjen,  
  17. Fyerjen dhe pengimin e votës së mërgatës – Shefat nuk e dhanë dorëheqjen,  
  18. Direktivën për me i harru krimet serbe dhe gjenocidin serb, duke e thënë këtë publikisht si dhe duke u përkuluar para varrit të paramilitarëve serbë – Shefat nuk e dhanë dorëheqjen,  
  19. Zhytjen e Kuvendit në lojëra të pista, si ndëshkim dhe tallje me institucionin më të lartë të Republikës – Shefat nuk e dhanë dorëheqjen, 
  20. Arrestimin dhe gjykimin politik disa herë të Albin Kurtit që sot është më i votuari i Kosovës – Shefat nuk e dhanë dorëheqjen 
  21. Largimin e dëshpëruar të qytetarëve, aq sa dhe lufta nuk kishte mundur ta bënte – Shefat nuk e dhanë dorëheqjen.   
  22. Rrëzimin e qeverisë së shpresës dhe pengimin e zgjedhjeve – Shefat nuk e dhanë dorëheqjen  
  23. Dëmtimin e PTK-së, shitjen ose faljen e KEK-ut, autostradat pa kontratë, përvetësimin e tokave dhe gotën e shampanjës, përpjekjen për me fut në pronësi të Ujmanit Kosovën – Shefat nuk e dhanë dorëheqjen, 
  24. Ngulitjen e opinionit se partia është para atdheut – Shefat nuk e dhanë dorëheqjen. 

Dhe atëherë mendoni se ç’do të thotë për këta me qenë sot në opozitë. Në kokën e tyre e kanë të ngulur thellë idenë se mund t’i bësh keq pafund Republikës dhe çdo gjë harrohet e falet. Prandaj kësi lloj shefash nuk e kanë hiç ndër mend të japin dorëheqje. Kjo është kapja e shtetit, kapja e institucioneve të gjyqësorit, të legjislativit, të elektoratit, të anëtarit të partisë, të vetë partisë: mendimi se ke të drejtë të shkatërrosh pa fund dhe të mos ndëshkohesh aspak. Përkundrazi, janë po këta që deklarojnë se janë të nderuar me punën e tyre dhe se do të bëjnë opozitën. Por nuk thonë se Lëvizja duhet të zgjidhë hallet ku ata vetë e kanë shtënë Kosovën. Është pra disi e pamundshme të mendosh se këto parti mund të rigjenerojnë një mendim e strukturim të ri. Mes tyre dhe antëtarësive të tyre koha ka ndalur dhe nuk shpresohet që të reflektojnë ndonjëherë as për një mendim të ri të republikës e as për një funksionim të ri të demokracisë. Ndaj e tërë politika e tyre është ajo e pengimit. Asgjë më shumë deri tani, të rinjtë e tyre janë rekrutë të të vjetërve. Shpresa e tyre është se mund të luajnë me zgejdhjen e presidentit. Ne do t’i shohim në ditët në vazhdim. Realiteti i sotëm politik është një parti e parë dhe shumë parti të treta.

©RrugaPress Të gjitha të drejtat të rezervuara


Next Post

OBSH-ja aprovon vaksinën AstraZeneca, pritet të përfitojë edhe Kosova

Organizata Botërore e Shëndetësisë (OBSH) ka aprovuar të hënën vaksinën anti-COVID të AstraZenecas dhe Universitetit të Oksfordit për përdorim urgjent. Nga ky vendim pritet të përfitojë edhe Kosova, pasi më herët COVAX kishte publikuar parashikimet rreth shpërndarjes së vaksinës për vendet që tashmë kanë aplikuar për këtë vaksinë. Kosova pritet […]