Pritet që Izraeli të fillojë me testimin e kapsulës kundër coronavirusit

Mes rasteve në rritje nga coronavirusi, të nxitura nga varianti Delta, Izraeli po përgatitet të fillojë provat e para klinike të një ‘vaksine’ orale kundër COVID-19, që mund të ndihmojë në rritjen e aksesit ndaj vaksinave në të gjithë botën, dhe të shërbejë si një përforcues më i përshtatshëm në të ardhmen.

Sipas mediave të huaja, Oravax Medical, një kompani e cila merret me zhvillimin e mënyrave për të aplikuar ilaçet nga goja, po përgatitet të fillojë provat klinike të vaksinës së saj orale kundër COVID-19 në Izrael, pasi mori dritën jeshile nga bordi i rishikimit në Spitalin Ichilov, spitali kryesor i Tel Avivit.

Provat – në pritje të rekrutimit dhe miratimit përfundimtar nga ministria e shëndetësisë në vend në javët e ardhshme – fillimisht do të shërbejnë si një “dëshmi e konceptit” për vaksinën e kapsulës, tha Nadav Kidron, shefi ekzekutiv i kompanisë mëmë të Oravax, Oramed Pharmaceuticals, në një intervistë për The Jerusalem Post.

Testimi i parë do të përfshijë 24 vullnetarë të pavaksinuar, secili duke marrë një apo dy pilula, dhe do të hetojë sigurinë e vaksinës dhe treguesit e imunitetit, duke kaluar në provat më të mëdha të Fazës 3 për të demonstruar efikasitetin në rast se rezulton i suksesshëm.

Vaksina duhet të jetë “shumë më rezistente ndaj varianteve të COVID-19”, tha Kidron, pasi stërvit sistemin imunitar kundër tre proteinave virale, në vend të proteinës së vetme të shënjestruar nga vaksinat Pfizer dhe Moderna.

Oravax gjithashtu po zhvillon kapsulën tjetër si përforcues për njerëzit që janë vaksinuar më parë kundër COVID-19, megjithëse planet për testimin e saj mbeten të paqarta./Telegrafi

Rruga Press