Qeveria në Kosovë paralajmëron Projektligjin për konfiskimin e pasurisë së pajustifikueshme

User2
0 0

Qeveria e Kosovës, gjatë mbledhjes të së martës, miratoi një koncept-dokument për konfiskimin e pasurisë së pajustifikueshme, që u tha se i hap rrugë hartimit të një projektligji për këtë çështje.

Ministrja e Drejtësisë, Albulena Haxhiu tha se Projektligji për konfiskimin e pasurisë do të mundësojë konfiskimin e pasurisë së pajustifikuar të personave të dyshuar, edhe nëse ndaj tyre nuk ka aktgjykim të formës së prerë.

“Inicimi dhe konfiskimi i pasurisë së pajustifikueshme i bën më efikase institucionet përkatëse në konfiskim të pasurisë sepse nuk kërkohet siç përcaktohet me legjislacionin aktual, që një herë duhet të dënohet personi me aktgjykim dënues e pastaj të fillojë procedura e konfiskimit ndaj tij. Kjo po e zgjat jashtëzakonisht procesin e konfiskimit dhe po e bën të padobishëm sistemin ligjor të konfiskimit”, tha Haxhiu.

Ajo tha po ashtu se do të themelohet edhe një agjenci e pavarur, e cila do të iniciojë procedurat ndaj personave që dyshohet se kanë përfituar pasuri të pajustifikuar apo të paligjshme.

Konfiskimi i pasurisë së pajustifikueshme konsiderohet si një ndër shtyllat në luftimin e korrupsionit në Kosovë.

Sipas ligjeve aktuale, konfiskimi i pasurisë nënkupton marrjen e përhershme të pasurisë që është fituar në mënyrë të kundërligjshme, sipas urdhrit të formës së prerë nga gjykata kompetente apo organi tjetër kompetent, kurse sekuestrimi nënkupton marrjen e pasurisë nga organi kompetent deri në vendimin e prerë të gjykatës.

Rreth 1.6 milion euro është vlera e aseteve të sekuestruara dhe të konfiskuara në vitin 2020 dhe të cilat janë në Agjencinë për Administrimin e Pasurisë së Konfiskuar dhe Sekuestruar.

Vlera totale e pasurisë se administruar nga kjo agjenci, që nga themelimi i saj një dekadë më parë, është afërsisht 40 milionë euro.

Rruga Press

Next Post

“Të rrëzohet pragu kombëtar 1 %”, Debreshi vë në lëvizje Gjykatën Kushtetuese

Kandidati i pavarur, Elton Debreshi dorëzon në Gjykatën Kushtetuese kërkesën për rrëzimin e pragut kombëtar, 1 % të sistemit zgjedhor proporcional rajonal. “Ky prag diskriminon kandidatët e pavarur të cilëve u kërkohen më shumë vota se partive për tu zgjedhur deputet në një qark. Për nga detyrimi për të fituar […]