Serbia po teston vendosmërinë e ShBA-së, BE-së dhe NATO-s në rajon
Shkëputur nga artikulli US Leadership Matters to Avoid New Violence in the Balkans në Just Security
Kërcënimi i hapur i Serbisë për luftë kundër Kosovës ishte alarmues, por jo befasues. Përshkallëzimi në rritje i tensioneve në rajon nga Serbia ka qenë konsistent dhe në rritje. Beogradi po teston vendosmërinë e SHBA-së, BE-së dhe NATO-s në rajon. Sa herë që destabilizimi i tij lihet i pakontrolluar regjimi i Vuçiqit inkurajohet të vazhdojë fushatën e tij të destabilizimit.
Ndërhyrja serbe në Mal të Zi ka dy qëllime evidente – të sfidojë karakterin civil të vendit si një shtet i suksesshëm etnikisht i larmishëm dhe të ndryshojë orientimin e tij strategjik të politikës së jashtme. Me një popullsi të përbërë nga 45 përqind malazezë, 29 përqind serbë, 8.65 përqind boshnjakë dhe 4.9 përqind shqiptarë, Mali i Zi mund të përparojë vetëm si një shoqëri multietnike, e hapur dhe gjithëpërfshirëse.
Vënia në krye e mitropolitit të ri të Kishës Ortodokse Serbe në Mal të Zi ndezi tensione etnike në të gjithë vendin, si një simbol i ndërhyrjes së vazhdueshme në Malin e Zi të pavarur nga qeveria në Serbi, e cila ka lidhje historike me Kishën Ortodokse Serbe. Kisha gjithashtu ka një histori të errët të nxitjes së ndarjes etnike gjatë luftërave në ish-Jugosllavi. Mbështetësit e pavarësisë së Malit të Zi duan një kishë të krishterë ortodokse që të jetë e ndarë nga Kisha Ortodokse Serbe. Kërcënimi shumëfishohet nga lidhjet e ngushta midis Kishës Ortodokse Serbe dhe Kishës Ortodokse Ruse, e cila vetë është e lidhur ngushtë me qeverinë në Moskë.
Kundërshtarët kryesorë të anëtarësimit të Malit të Zi në NATO në vitin 2017 dhe të së ardhmes së tij në BE janë tani në qeveri. Fronti Demokratik, partneri më i madh i koalicionit në qeverinë aktuale malazeze është një mbështetës i vendosur i politikës hegjemoniste serbe në rajon.
Fronti disa herë e ka mohuar publikisht gjenocidin e 1995-ës në Srebrenicë, pavarësisht njohjes së mizorive nga një qeveri dhe parlament i mëparshëm, dhe i bëri thirrje qeverisë të heqë sanksionet kundër Rusisë, të tërheqë Malin e Zi nga NATO dhe të revokojë njohjen e Kosovës.
©Rruga Press