UEFA nderon me çmimin e Presidentit, Kjaer dhe stafin mjekësor danez
Institucioni i futbollit europian nderon protagonistët që shmangën tragjedinë e mundshme të Cristian Eriksenit në stadiumin e Kopenhagenit
Mjekët që shpëtuan jetën e Christian Eriksen në “Euro 2020” dhe kapiteni i kombëtares daneze, Simon Kjær, nderohen me çmimin e “Presidentit UEFA 2021”,- ka njoftuar sot UEFA në një shënim të saj.
“Çmimi i Presidentit UEFA” për vitin 2021 shkon për të gjithë njerëzit, që shpëtuan jetën e Eriksen, i cili pësoi një arrest kardiak gjatë ndeshjes së “Euro 2020” midis Danimarkës dhe Finlandës, të luajtur në stadiumin “Parken” të Kopenhagenit, më 12 qershor.
Falë shpejtësisë dhe përvojës së stafit mjekësor, Cristian Eriksen u ringjall në fushë dhe sot është në rrugën e shërimit. Çmimi i shkon gjithashtu Simon Kjær për shpejtësinë e tij në ndihmën e shokut dhe për udhëheqjen e tij të ekipit danez.
